వేదవ్యాస కృత మహాభాగవతాన్ని ఆంధ్రీకరించిన శ్రీమాన్ పోతనామాత్యులవారి అమృతతుల్యమైన తెలుగు పద్యాలను మధించి పద్యపద్యాన్ని తరచి తరచి ఎంచి ఐ భాగవత ఆణిముత్యాల పేరుతో తరతరానికి పెరుగుతున్న అద్భుత అనంత జ్ఞాన పిపాస సామర్థ్యాలతో అలరారుతున్న మన నవ తరపు తెలుగు బంగారు శిశువులకు అందించటం ఈ సంస్థ యొక్క ముఖ్య ఉద్దేశం.

రకరకాల ఐఫోనులు, ఐపాడ్, ఐపోడు, నానో, ఐవాచ్ వంటి బహుళ సాంకేతిక సంచారణులు, టేబ్లెట్టులు, లాపుటాపులు, కంప్యూటరులతో అతి సులువుగా ఆడేసుకుంటున్న పిల్లల చురుకు స్థాయికి తగినట్లు అందించటం.

ఈ కృషికి సార్థకంగా పేరు ఐబిఎఎమ్ (అంతర్జాల భాగవత ఆణి ముత్యాలు) అని ఎంచుటకు కారణం అంతర్జాల, కంప్యూటరు పరిజ్ఞానాల అందుబాటు సర్వసామాన్యం తప్పనిసరి అనే భావన. వాటికి తగ్గట్లు నాలుగు ఉత్పత్తులు సర్వం, సర్వులకు సర్వవేళలా సర్వే సర్వత్రా సర్వసిద్దంగా అందుబాటులో ఉండాలి. వలసిన అంతర్జాల దూరవాణి ఆదులైన వాటి సర్వ మాధ్యమాలు అన్నిటిలోను సంపూర్ణంగా అనర్గళంగా అందుబాటులో ఉంచాలి.

ఈ నాలుగు ఉత్పత్తులు ఏవంటే:

• ఐ భాగవత ఆణి ముత్యాలు (ఐబిఎఎమ్) జాబితా (ఐబిఎఎల్)
• ఐబిఎఎమ్ పద్యాలు తెలుగు యూనికోడు లిపిలో (ఐబిఎపి)
• ఐబిఎఎమ్ పద్యాల ప్రతిపదార్థ తాత్పర్యాలు తెలుగు యూనికోడు లిపిలో (ఐబిఎటి)
• ఐబిఎఎమ్ సందర్భ భావ సహితంగా పద్యాల గాత్రం ఎంపి3 రూపంలో ఆడియో (ఐబిఎఎ)

ఈ ఉత్పత్తు లన్నిటి ద్వారా పోతనగారి భాగవతంలోని ఆధ్యాత్మిక సౌరభాలు అన్ని వయసులవారికి అందించటమే మా ప్రధాన లక్ష్యం అయినా, పాఠశాలలో తెలుగుని భాషగా నేర్చుకొని, ధారాళంగా రాయటం, చదవటం, మాట్లాడగలగటం నేర్చి ఉండే అవకాశం ఉంది కనుక ముప్పై ఆపైన వయసు వారికి మొదటి మూడు ఉత్పత్తులు మరింత అనుకూలం కావచ్చు

ఇప్పటి నవతరంలో మూడేళ్ళ ఆ పై వయసు వారికి రాబోయే తరాల వారి కోసం ఉద్దేశించినది నాలుగవ ఉత్పత్తి గాత్ర (ఆడియో) ఉత్పత్తి. కాని వారిలో మన ఆధ్యాత్మికసౌరభాలపై ఆశక్తి విరియాలంటే, వారికి సందర్భ తాత్పర్యాలు అందించే అవసరం బాగా ఉంటుంది. వారి అనంతమైన గ్రహణ శక్తి, వినూత్న సాంకేతిక పరిజ్ఞానాన్ని వాడుకొని ఈ మాధ్యమాల ద్వారా ఎంత పెద్ద విషయాలనైనా ఆకళింపుచేసుకోనే నేర్పు, అమితాశక్తి, సామర్థ్యాలు వారికి ఉన్న మూలబలం. అలాంటి ఈనాటి తరం, రాబోయే తరతరాల వారి యందు భాగవత ఆధ్యాత్మికత పరివ్యాప్తి చెందించడానికి సుళువైన సాధనం సిద్దం చేయాలన్నది ముఖ్య ఆలోచన. మన యీ ఐబిఎఎం విజయవంతమైతే, తిరుపతి తిరుమల దేవస్థానం, శృంగేరి విద్యా పీఠం వంటి అనేక సంస్థలు కూడ వివిధ భాషలలో మల్టిమీడియాలో యువ తరాల వారికి మన విజ్ఞానాన్ని అందించే అవకాశాలు ఉన్నాయి. ఐబిఎఎం సభ్యులుగా మనం మొదలెట్టిన ఈ బృహత్తర ప్రయాణంలో ఇది మొదటి మెట్టు మాత్రమే అని గమనించండి.